IN MEMORIAM INCLYTAM
CLEMENTIS DESESSARD

- Scripsit Gaius Licoppe -

Die 2I m. Februarii vita functus est Clemens Desessard, unus ex eximiis Latinitatis Vivae fautoribus. In urbe Telone Martio (v. Toulon) anno I920 natus, studia secundaria ibi perficit. Tunc temporis litterae Latinae et Graecae minus attractivae ei videntur quam scientiae naturales.

Amno I939 Scholam Classis Aeriae intrat, sed paulo post, studiis clade Francogallica interruptis, in Marocium mittitur una cum ala classes aeriae. Exeunte anno 1942, cum Americanorum exercitus in Africam Septentrionalem expositus esset, indutias cum Germanis post clade factas rumpit atque Magnam Britanniam petit, ubi fit navigator in turma ocroplanorum bombiferorum.

Bello finito, studia perficit in Instituto Polytechnico Gratianopolitano (v. Grenoble). Ingeniarius radiotechnicus factus, usque annum 1966 varils muneribus fungitur in classe aeria, ubi gradum colonelli obtinet. Postea operam dat in Societate Nationali Aerospatiali tamquam machinator civilis usque annum 1982, quo rude donatus est.

Non crederes talem virum pronum fieri potuisse ad sermonem Latinum exercendum et propagandum. Ex belli tamen experientia mente conceperat quanto detrimento Europaeis fuissent fanatici nationalismi ; valde ei placebat consillum Europae couniendae post bellum ortum, sed de necessitate linguae Europaeis communis multum cogitabat. De lingua Latina olim in schola discita recogitare coepit, libros Latinos iterum aperuit. et fortasse nihil suscepisset, nisi quid inopinanter accidisset. Nartando enim cum crus fregisset, in nosocomio sex septimanas iacere debuit. Ad tempus terendum in Latinum vertit Titini facinora, quae narrantur sub titulo qui est De Rachami Rubri'thesauro.

Eodem fere tempore aliquid fortulto audivit de consociatione Vita Latina atque anno 1958 eius primi conventus acta emit, in quibus legit haec : " ... quod nihil obstat quominus methodus Assimil quae dicitur adhibeatur.. ". De hoc consilio diu cogitavit, dubitans num talem rem suscipere valeret ; anno 1963 domum editoriam Assimil de proposito suo interrogare tandem ausus est, quod inexspectato modo placuit. Restabat ut ipsa methodus excogitaretur et componeretur, id quod fieri potuit iuvantibus Patre Basilio Hypeau O.S.B. et Oreste Badellino, lexicographe Taurinensi (v. Torino). Liber c.t. Lingua Latina sine molestia Parisiis editus est anno 1966 et postea compluries iterum editus. Versio Italiana etiam est anno 2002 divulgata.

Anno 1963 Clemens Desessard tertium Conventum Internationalem Vivae Latinitati Fovendae Argentorati (v. Strasbourg) participavit, ubi in acroasi c.t. " Non sufficit Latinum sermonem inter doctos communem esse " propositum methodi Assimil praenuntiavit. Omnes conventus Latinitatis Vivae postea actuose participavit.

Cum Vocis Latinae fasciculum 69 aliquando legeret, comperit Patrem Suitbertum Siedl, Austriacum, pro Opere Fundato Latinitate " Ferias Latinas Tiniacenses " (v. Teinach) in Slovenia anno 1982 primum instituasse atque tales Ferias Olbiae (v. Hyères) in Provincia anno 1984 instituturum esse. Itaque ad Patrem Suitbertum statim scripsit auxilium suum offerens, cum ipse in Provincia natus esset. Ab eo tempore Clemens Desessard Ferias Latinas in Provincia quotannis ordinavit, Olbiae imprimis, postea Sophiae Antipoli (v. Antibes), Nicaeae (v. Nice), denique in Abbatia Ferigoletensi. Pater Suitbertus Ferias non diu moderatus est ; eius munere etiam fungi debuit Clemens Desessard, nonnullis adiuvantibus.

Grandaevus et gravi morbo affectus, his novissimis annis Ferias ipse vix curare poterat. Feliciter lohannes Claudius Champeau, etiam Provincialis et fidelis Feriarum particeps, eius vicarius et successor factus est.

Mihi gratiae singulares Clementi Desessard agendae sunt ; nam Latinitatem vivam primum novi cum eius methodum Assimil fortuito invenirem. Ipsum Clementem primum conveni Augustae Treverorum (v. Trier) anno 1981i inter Conventum Academiae Latinitati Fovendae. Inde bonam consuetudinem iunximus, cuius serenitas anno 1991 querela quadam perturbata est ; Clemens tamen bonum Latinitatis Vivae iracundiae suae semper anteposuit ; quare, eo invitante, Ferias Latinas, quibus nonnullos annos iam non intefueram, his novissimis annis libenter iterum participavi.

Optime meritus est Clemens Desessard de Latinitate viva et de cultu Europaeo vivificando. Sit ei terra levis.